Irdmuzejan pämez’ Jelena Bogdanova sanub, miše tämbei 9. kezakud muzei avaidab ičeze uksed turistoile. Mugoine käsk tuli muzejaha Venäman kul’turan ministerstvaspäi egläi ehtal. Sar’muzei om avaitud kaikuččen päivän 8.00-20.00.
— Kižin muzejas voib kävuda Karjalan turistobjektoil gigienan sändoiden mödhe. Turistad voiba kävelta irdmuzejan alovehedme kävumata pusauvotusehe da pidäden sociališt distancijad, sanub Boganova. Lähttes sarele turistoile pidab otta kerdale modmask, kaičuzsormikod, vezibutulk, sömišt, smartfon Internetanke, mitte radab sarel kut audio-gid, da bankkartaine. Biletan voib ostta muzejan terminalas sarel bankkartal.
Kiži-muzejan pämez’ ei heita voimust, miše ezmäižed turistad voiba tulda sarele jo tämbei vai homen. No kaiken-se muzei ei tege sarele ajamišt nügüd’. Tobjimalaz enambišt turistoid päzub sarele Petroskoišpäi kometal vai Piterišpäi laival. Bogdanovan sanoiden mödhe kometoiden ajamižen aigmär lähteb eloho nedalin päliči. Ut tedod Kižin matkas voib sada muzejan kodilehtpolel.