Belomorskissa Karjalan rintaman musejon šuuri rekonstruktio alko vuuvven 2019 šajekuušša. Šamanaikasešti rakennuš- ta korjauštöijen kera musejošša valmissetah salija näyttelyjä varten, tuuvvah varuštehie näyttöikkunoijen luatimiseh, rakennetah . Musejo šijautuu istoriallisešša rakennušešša – šotilašvuosina šielä oli Karjalan rintaman Belomorskin šotilašošašto. Nyt korjaušruavot ollah jo loppušuoralla, avata musejo šuunnitellah 30. šyyškuuta – fašistivallottajista Karjalan vapuamisen päivänä.
Heinäkuun alušša Karjaln piämieš Artur Parfenčikov kävi Belomiskissa ta kaččo, miten musejo valmistautuu avuamiseh.
- Valmissamma näyttelyö muantietoperuštehen mukah Leningradin alovehelta Murmanskin alovehella Ribačii-niemimualla šuaten. Myö esitämmä kaikki tämän alovehen šotilašošaštot, rintaman šelkämän, kekityšleirit ta tietyšti omissamma näyttely Voitolla ta Karjalan rintaman istorijalla – kerto Estafeta pokolenii -fondin puhienjohtajan šijahini Ilja Gerasjov. Tämä yhteiskunnallini järještö kekši musejon konseption.
Esinehie musejon kokoelmah tuuvvah eri paikoista: Karjalan kanšallisen musejon fondiloista, eččijien löyvokšie, esinehet yksityiskokoelmista. Niise musejošša avatah oma elokuvateatteri.
Uuši musejo valmissetah Venäjän presidentin miäräykšen ta federalisen Karjalan kehityšohjelman mukah. Rekonstruointie rahoitetah Karjalan kehityšohjelman (240 miljonie rupl’ua) ta Venäjän kultturiministerijön varoista (28 miljonie rupl’ua) šekä tašavallan b’utžetista (5 miljonie rupl’ua).