Karjalan tašavallan kanšallisen ta alovehellisen politiikan ministerijön spesialistit ilmotettih tašavallan piirihallintojen kilpailuvalinnan tulokšet. Kilpailuh oli työnnetty 17 anomušta. Voittajat tašavallan kuuvvešta piiristä šuahah miljoni rupl’ua projektien toteuttamiseh, mit on šuunnattu Karjalan kantakanšojen elinalovehien etnokulttuuriseh kehitykšeh.
Voittajien luvettelošša ollah:
– Kalevalan piirin Myö tiälä elämmä ta tämä šeutu on meilä armaš -projekti. Projektin rajoissa piirin šeiččemeššä kyläššä ašetetah nimikylttijä, kumpasissa juohatetah katujen nimet karjalan ta venäjän kielellä. Paikallisilla eläjillä järješšetäh karjalan kielen kurššijä, vietetäh perintehellisillä ammattiloilla omissettuja muasteri-oppija, kunnoššetah kenttä Lönnrotin männyn luona Kalevalašša;
– Belomorskin piirin projekti “Muasterien kauppa “Belomorskije rukom’osla”. Šuatulla rahalla piirissä peruššetah käsityömuasterien liitto, valmissetah paikallisien muasterien luajokšien šähkövarašto, kumpasešša šuau nähä kultaompelukšie, pomorilaisie pukuja tni. Käsityömuasterit šuahah mahollisuon esittyä omie töitä Muasterien kaupašša, mi avatah paikallisen kulttuuritalon tiloissa;
– Onegarannan piirin Myö olemma yheššä! -projekti. Piirissä jo monta vuotta peräkkäh vietetäh perintehellistä vepšäläistä Kalarand-pruasniekkua. Voitto kilpailušša antau mahollisuon projektin rajoissa peruštua piirissä vepšäläini Kalarand-etnopuisto. A Uuvven Vilkan kulttuuritalošša kaikki halukkahat šuahah opaštuo karjalan kieltä;
– Aunukšen piirin projekti “Muamankieli – rahvahan hengi”;
– Priäžän piirin Priažan lagevus -projekti;
– Karhumäjen piirin projekti “Karhumäjen piirin vierailukeškuš”.
KT:n kanšallisen ta alovehellisen politiikan ministerijö kiittäy kilpailun ošanottajie, onnittelou voittajie ta toivottau toimenpitojen šujuvua toteuttamista.