Grantin rahat käytetäh ammatillisih elokuva- ta matkailuprojektiloih.
Karjalan elokuvaluatijat šuatih grantti rajanylittäjän yhteistyön ohjelman rajoissa. Grantti 420 tuhatta euruo annettih Lokki-projektin toteuttamiseh.
Projektin kirjuttaja, Karjalan elokuvaliiton johtaja Aleksei Babenko kerto, jotta šuurin oša rahašta käytetäh uuvven tekniikan oštamiseh. Šamoin näillä rahalla kuvatah Hau a ju -filmie ta Erikoini yhtevyš -šarjafilmie.
Hau a ju -filmin kuvaukšie alettih Onegan niemimualla Šuuri Lahti -kyläššä. Filmin ohjuajana on Aleksei Babenko. Piärooliloissa esiinnytäh Karjalan anšijoitunuot artistat Irina Starikovič ta Dmitrii Maksimov. Komedijassa Irina on yksinäini epäonnellini naini, kumpani haluou matkuštua pojan luo Amerikkah ta Dmitrii on epätavallini mieš, kumpani rupieu vahtimah naisen taluo matan aikana. Ohjuajan šanojen mukah kuvaukšiе lopetetah enši vuuvven tuiskukuušša, šitä ruvetah näyttämäh elokuvafestivaliloissa šekä Karjalan elokuvateatteriloissa.
Šen lisäkši grantin rahoilla Lokki-projektin rajoissa valmissetah Karjalan kartta. Šiinä merkitäh paikkoja, missä kuvattih filmijä tahi missä niitä šuau kuvata. Šitä varoin Karjalašša järješšetäh elokuvatutkimušmatkoja.