Karhumäjen alppihiihtokeškuš vuottau korjaušta
Karjalašša jatetah urheiluinfrastruktuurin uuvvistamista. Petroskoissa olijan Kurgan-urheilukeškukšen lisäkši muutokšet vuotetah Karjalan piirien urheilupaikkoja, kumpasien joukošša on Karhumäjen alppihiihtokeškuš.
Nyt valmissetah šuunnitteluasiekirjat ta kuštannušarvijo.
– On vaikie šanuo, konša korjauš alkau, vain on šelvä, jotta še luajitah välikautena, šano Karhumäjen urheilukoulun johtaja ta alppihiihtourheilijien opaštaja Pavel Ogluzdin.
Alppihiihtokeškukšen alovehella ašennetah lumitykki.
– Ratojen lumetuš on tärkie oša alppihiihtuo. Keinotekoni lumi on luonnonlumie liukkahampi ta šiitä šuau valmistua helpošti hiihtorata, Ogluzdin lisäsi.
Valmentaja on varma, jotta lumitykin avulla šuau pitentyä hiihtokautta.
– Još viime vuosina hiihtokauši alko pakkaiskuušša ta loppu kevätkuušša, niin uuvvissukšen jälkeh Karhumäješšä šuau harraštua alppihiihtuo šajekuušta oraškuuh, Ogluzdin huomauttau.
Uuvvissettu Karhumäjen hiihtokeškuš vaštau alppihiihtourheilun standarttija.
