Kantatuattojen kieli ei šua šammuo

Onlain-toimenpivošša Ol’ga Kenjeva kerto, jotta Kalevalan koulumusejošša šäilyy Andrei Kapasen ainutluatuni kuva. Še lahjotettih musejolla Andrei Petrovičin tyttäret. Kuvašša opaštaja levähtelöy mečäššykšen jälkeh. Kuvan otti Vasselei Kirillov Vuonnisešša

Voitonpäivän uattona Uhut-šeuran jäšenet muisseltih Kalevalan koulun šotavateranija. Šäilytämmä muistuo –onlain-toimenpivon piähenkilöinä oltih Kalevalan koulun anšijoitunuot opaštajat: Aleksei Martinovič Pekšujevin šyntymän 100 vuotta ta Andrei Petrovič Kapasen šyntymän 115 vuotta vietetäh tänä vuotena. Hyö molommat ollah šotavateranit, kumpaset omašta rohkevuošta ta taisteluanšijoista on palkittu metaliloilla ta kunnivomerkkilöillä.

Uhut-šeuran onlain-pakinah otettih ošua kanšalaisjärještön jäšenet, heijän lapšet, punukat, opaštujat ta piirin eläjät. Hyö kerrottih omie muisselmie Kalevalan muan mainijoista ihmisistä, opaštajista.

– Projektin toiminta jatkuu ta lahjottau äijän hyvie tuntehie, korošti Uhut-šeuran johtaja Valentina Kovalenko. – Kantatuattojen kieli ei šua šammuo -projektin rajoissa on šuunniteltu lukusie tapahtumie ta mukavie toimenpitoja. Oša niistä on omissettu miän muanmiehillä, uhtuolaisilla, kumpaset jätettih huomattava jälki piirin istorijašša, muisson ičeštä šekä ruattih äijän pos’olkan kehittämisen hyväkši.