Ainutluatusie tietoja kerättih projektin toteuttamisen rajoissa
Perintö-alkuhpanijaryhmän Lapšuoni kotikylä -projekti oli šujuvašti toteutettu viime vuotena Kontupohjan piirin Liidekyläššä. Lapšuoni kotikylä -projekti piäši Aktiivini šukupolvi -ohjelman parahien projektien kolmoseh ta šen toteuttajat šuatih kučun Piiterin Dobri gorod Peterburg -hyvänluajintafondin Nykyaikaset vanhemmat -konferenšših.
Projektin johtaja Nadežda Basalajeva kerto, millä projekti on omissettu, mimmosie vaikevukšie piättäy ta mimmosie šillä on tarkotukšie.
Naini šynty Liidekyläššä. Ennein hänen kotikylyä šanottih venäjäkši Vostočnaja-kyläkši, a vuuvvešta 2008 šillä annettih Vostočnoje Končezero -nimi. Kylä on hyvin pieni, šielä ympäri vuuvven eläy vain kuuši ihmistä. Toiset ihmiset tullah kešäkši tahi pruasniekoiksi. Näijen ihmisien kešen on šemmosie, kumpaset tullah kyläh omien vanhempien taloh, šinne, missä mäni heijän lapšuš. Projekti on tarkotettu juuri heilä – näillä ihmisillä, kumpasien taival on yhissetty Liidekyläh.
– Projektin rajoissa myö keräsimä ainutluatusie tietoja šeiččemen perehen istorijašta. Šamoin kylän alušša myö ašettima tietotaulun, missä on kuvattu Liidekylän viime vuosišuan kešen kuavakuva, kerto Nadežda Basalajeva.
Šen lisäkši projektin rajoissa šen toteuttajat kerättih noin 70 paikannimie ta murrehšanua, kumpasie käytettih Liidekyläššä. Hyvä, jotta nämä šanat ei oltu unohettu eikä kavottu.
Projektin lopušša Perintö-alkuhpanijaryhmä šai hyvin äijän arvošteluja. Niistä voipi luatie piätöš, jotta vanhempi šukupolvi kiinnoštu šukututkimukšeh ta maltto, jotta on hyvin tärkietä kuččuo tähä työh nuorempua šukupolvieki.
