Tänäpiänä Šuomešša juhlitah Unikevonpäivyä
Šuomešša šuurta pruasniekkua Unikevonpäivänä järješšetäh Naantali-šatamakaupinkissa. Še on Naantalin huippupruasniekka.
Tämä perinneh tuli Keškiajoista ta šiih liittyy legenda šeiččemeštä ristikanšašta, kumpaset muattih 200 vuotta luolašša pelaštuan Rooman keisarilta. Myöhemmin legenda muuttu tarinah ihmisistä, kumpaset uinottih ta konša havaččeuvuttih, ni nähtih jotta muailma on jo toini. Šiitä tuli uškomuš, jotta unikevonpäivänä ei šua muata pitempäh, kuin tavallisešti.
Unikevonpäivyä vietetäh Europašša 1600-luvun alušta. Šuomešša šuurta pruasniekkua enšimmäisinä ruvettih järještämäh Naantali-šatamakaupinkin eläjät. Nyt še on Naantalin huippupruasniekka.
Perintehellisešti kaupunkissa valitah laiskimuš, kumpani tykkyäy muata pitälti. On mukava, jotta unikeko valitah etukäteh peitočči. Pruasniekkapäivänä aikaiseh huomenekšella unikeko tuuvvah vanhan kaupunkin rannalla peittehen alla ta heitetäh šankyštä merišataman veteh. Ta vašta šen jälkeh, kun kaupunkilaini noušou laiturilla, pruasniekkaväki näköy, ken on tämän vuuvven laiskuri ta unikeko.
Šen jälkeh pruasniekan rikaš ta vesselä ohjelma jatkuu myöhäh šuaten. Pruasniekkua pietäh joka vuosi, ka tänä vuotena šitä ei vietetä pandemijan takie.
