Kipinä-žurnualu oli gostis Vieljärven školas
Tänäpäi “Kipinän” toimittajat käydih Vieljärven školan kaheksanden, yheksänden, kymmenenden da yhtendentostu kluasoin opastujien luo. Kipinäläzet kerroittih žurnualas da sen histouries, kehoitettih lapsii yhtymäh tiedokilbah Karjalah da žurnualah nähte, yhtes lapsienke kižattih kižah “100 sanua Karjalah nähte”. Paiči sidä lapset yhtyttih ruadopajah, kus hyö luajittih värikkähät Uvven vuvven poštukartočkat drakonanke.
— Meijän školas kaikkiedah on 99 školaniekkua da jogahine heis opastuu libo suomen, libo karjalan kieldy. Erähis kluasois suomen libo karjalan kieli on urokannu, erähis – jälles urokkoi. Jo kolme vuottu peräkkäi vahnembat vallitah opastettavakse karjalan kieldy, muga enzimäzel, toizel da kolmandel kluasoil karjalan kieli on kerran nedälis, sanou Vieljärven školan karjalan da suomen kielien opastai Julija Jegorova.
Ei muga ammui loppui Kipinä-žurnualan Kenekse minä roimmos -kilbu da erähät kilbah yhtynnyöt eletäh juuri Vieljärves. Žurnualan toimittajat tuodih heile lahjat – šallut da piirdimet. Piälahju – šalgu, flomasterat, bloknouttu da “Periodikan” kniigu “Karjalazet suarnat” – sai kymmenenden kluasan opastui Marija F’odorova. Häi tuli voittajakse niilöin keskeks, kuduat kirjutettih kilbah suomen kielel. Kilbah työtyt ruavot suau nähtä Kipinä-žurnualan erähis noumerois.
