“Vepsän kul’tursebr” tegi voden ühthevedod
“Vepsän kul’tursebran” vastusel tehtihe necen voden ühth evedod. Necil vodel kul’tursebr ühtni 26 azjtegoho. Surembad niišpäi oma Pohjoižen rahvahiden festival’ Piteriš, Venäman rahvahiden forum Moskvas, II Venäman suomalaiž-ugrilaižiden rahvahiden forum Saranskas, I Pohjoižen naižiden forum Piteriš.
Sen ližaks, täl vodel Vepsän kul’tursebr tegi suren “Kel’ — minun Kodima” -projektan, miččen aigan oli änetadud kaks’ ut audiokirjad vepsän kelel, kuvatud viž videorolikad vepsläižiš tradicionaližiš aburadoiš, pästtud eloho “Ezmäine änik” -kirj. Mugažo projektan rahoile tehtihe vepsän kelen kursad, pirdandan da fotokuvadandan mastar’-klassad vepsläižil elotahoil da Petroskoiš.
— Tulijal vodel Vepsän kul’tursebrale täudub 35 vot. Jubileivodel mö tahtoižim tehta mitte-ni sur’ azjtego. Voib olda, nece linneb tedokonferencii. Necen azjtegon päivmäras da tegemižen tahos völ diskutiruim, sanub sebran pämez’ Larisa Čirkova.
Tulijaks vodeks paiči jubilejan praznuičendad Vepsän kul’tursebran planoiš om pidäda vepsän kelen nedal’, diktant vepsän kelel, pästta uded openduzkirjad. Ližaks, tulijal vodel Vepsän kul’tursebr tegeb “Sanu, luge, kirjuta” -projektan, mitte om oigetud vepsän kelen opendamižehe nügüdläižiden tehnologijoiden abul.
