Venäjän tietoakatemija täytty 300 vuotta
Tuiskukuun 8. päivä on Venäjän tietopäivä. Juštih tänä päivänä Venäjän tietoakatemija oli peruššettu. Tänä vuotena še täytty 300 vuotta.
Merkkipäivänä Onegan rantakavulla avattih Karjalan tietokeškuš -jiäveššoš. Šen luatijana on Aleksandr Kim — veššoš- ta disainikilpailujen, -festivalien monivuotini ošallistuja ta voittaja.
— Veštäjä näytti Karjalan tietokeškukšen kokonaisutta ta korošti Venäjän Pohjosen ympäristö- ta luontoproplemojen, luontoresurssien ta kulttuuriperinnön tutkimušta, on šanottu Karjalan tietokeškukšen Vkontakte-šivulla.
Tietopäiväkši on omissettu Kielen, kirjallisuon ta istorijan instituutin nuorien tietomiehien neuvošton perintehellini aktijo “Arvautukšien netäli”.
— Joka päivä netälin aikana myö julkaisemma yhen arvautukšen instituutin nuorien tietomiehien Vkontakte-ryhmäššä. Arvautukšet ollah istorijašta, kanšantutkimukšista, folklorista ta paikannimilöistä. Tänä vuotena ryhmän šeuruajat niise kekšittih arvautukšet aktijokši, šelitettih neuvošton aktivistit.
Aktijon lopušša valitah kolme aktiivisinta ošallistujua. Enšimmäini arvautuš on jo julkaistu Vkontakte-ryhmäššä ta še on omissettu paikannimissöllä.
