Uz’ jaugmäčtandreh Šoutjärves
Sergei Safonov, Šoutjärven eläi, jaugmäčvändon polhe tedab todeks kaiken. Hän äi vozid vändi neche vändoho professionaližesti, a nügüd’ jo opendab lapsid vändmaha jaugmäčhu. Necile azjale abutab uz’ sporttandreh, mitte ei amu oli avaitud Šoutjärves.
Jaugmäčtandreh om universaline, se om avaitud kaikile tahtnikoile, ken tahtoiži pidäda miččid-se sportčasuid.
Nece londusetoi päluz tuli eloho sijaližiden iniciativoiden tugiden programman abul, mitte radab Karjalas. Mugažo neciš azjas abutiba Karjalan valdkundmehišt , Rahvahaližen da regionaližen politikan ministerstv, sijaline valdmehišt da Šoutjärven külän administracii.
– Tänna tuleba lapsed ezmäižespäi ühtendehetoštkümnendehesai klassahasai. Mugažo radam ühtes toižidenke vepsläižidenke külidenke, eskai Piterin agjanke. Äi Petroskoin joukud oma vaumhed tulda adivoihe meidennoks, miše kehitoitta fizkul’turad da sportad, sanub Šoutjärven külän deputat Sergei Safonov.
Jo kahesandel päiväl elokud uz’ sporttandreh vastsi adivoid ičeze praznikal, fizkul’turan radnikan päiväl. Programm vahvištadihe ottes homaičushe koronavirusan epidemijan pidätusid.
