Tie Kotkatjärveh pannah kundoh
Anuksen piiris ruvettih kohendamah tiedy, kudai Vedäy Kola-juamalpäi Kotkatjärvele da Kotkatjärvelpäi Kola-juamale. Tänäpäi kohendusruadoloi pietäh tiel, kudai vedäy Kotkatjärvele.
Mennyt vuon Kotkatjärven eläjät kiännyttih Karjalan piämiehen Artur Parfenčikovan puoleh, ku tie pandas kundoh. Kotkatjärvel eläy piäl 600 hengie, tie on ylen tärgei heile. Sidä tiedy myöte rahvas ajetah Anukseh, Petroskoih da Piiterih.
— Tie on ylen tärgei meijän kyläh niškoi — tiedy myöte kulgietah škola-avtoubussu, kiirehellizen avun mašinat, tulipalomašinat, reissuavtoubusat. Kyläs on škola, feršalipunktu, kul’tuurutaloi, nygyaigaine kirjasto, tulipalo-ozasto, päivykodih. Meijän školah vietäh opastumah lapsii lähikylispäi — Koveris, Uutärves, Tenhas, Ylä-Anuksespäi. Kohendettuu tiedy myöte suau ajua teriämbi da parembi. Vuotammo kohendusruadoloin loppuu, sanoi Kotkatjärven kyläkunnan piälimäine Nadežda Rubets Karjalan piämiehen lehtistöpalvelule.
Voulogdan TransStroiPrirodResurs-laitoksen ruadajat tänäpäi pannah uuzii ojitustrubii: eläjih niškoi nämmis kohtis on luajittu kiärdäjät väliaigazet tiet. Pannah kundohgi tien reunat da rindehet, pilatah iäres liijat puut da tuhjot.
Paiči Kotkatjärven lohkuo, tielöi kohendetah Anuksen toizis kohtisgi: Pannah kundoh Ylä-Anukseh vedäjiä tiedy da Keskoijärven kylätiedy.
