Šulakuun 18. päivänä Venäjä-näyttelyššä pietäh Periodika-kuštantamon päivyä. Kuštantamon toimittajat esiinnytäh Karjalan tašavallan paviljonissa. Hyö varuššettih mukava ohjelma interaktiivisine tehtävineh Venäjä-näyttelyn vierahilla.
“Periodikan” johtaja Natalja Sinitskaja kertou kuuntelijilla ainutluatusen kuštantamon toiminnašta. Periodika-kuštantamon šeinissä valmissetah kanšalliskielisie julkaisuja ta kirjoja, šamoin šielä toimitah Karjalan kanšojen yštävyštalo ta Karjalaisien, vepšäläisien ta šuomelaisien kieliresurssikeškuš. Näyttelyn kävijillä esitetäh kušantamon julkaisuja ta šanellah kirjoja.
— Folkloristi Valentina Mironova kertou kirjoista, kumpasie kuštantamo paino hänen avulla. Še on Pedri kuulužu kuningas -kokomuš, Aleksandra L’ubarskajan “Kalevala lapšilla kerrottuna” šekä Valentina Kuznetsovan Oneganiemen bilinoja -kirja. Valentina Petrovna tahto kertuo täštä teemašta, šentäh kun Karjala on ainutluatuni aloveh, missä šäily äšen kakši eepossua: Venäjän eepossa – bilinojen muuvvošša ta Karjalan – eeppisien laulujen muuvvošša. Toista šemmoista alovehta ei ole olomašša, koroštau Natalja Sinitskaja.
“Oman Muan” ta “Kipinän” toimittaja Maikki Remšujeva muasteri-opissah tuttavuštau vierahie Kipinä-kuklah ta šen karjalaiseh ta vepšäläiseh pukuh. Šamoin muasteri-opin Vil’l’a-aitta-ošašša tulou mahollisuš šuaha tietyä karjalaisien muanviljelykšeštä ta šyömisistä leikkimuuvvošša.
Käsityömuasteri Margarita Kemppainen kertou perintehelliseštä XIX vuosišuan ta keškiaikasešta karjalaisešta puvušta šekä viettäy omua muasteri-oppie “Paikka-transformeri”, kumpasen aikana esittäy, kuin yhtä paikkua voipi šituo eri keinoin ta käyttyä eri taloušhommissa.
Šamoin “Periodikan” ruatajilla tulou aikua tutuštuo Venäjä-näyttelyn toisihki ošaštoih. Šuuri näyttely auttau kaikkie ymmärtyä, kuin šuuri ta mahtava meijän mua on. Šen jälkeh monella kävijällä šyntyy mieli matkuštua enemmän Venäjän loittosilla alovehilla ta nähä aivan erillistä elämäntapua ta luontuo.
Periodika-kuštantamon toimittajien matka Venäjä-näyttelyh oli šuoritettu Karjalan tašavallan rahotukšella. Še on toimenpitošarjan oša, kumpasen rajoissa šulakuun alušša VDNH-keškukšešša vietettih Luminaisen livvinkarjalan kielikurššija, 16.–18. šulakuuta piettih vepšän kielen kurššija ta oraškuušša järješšetäh vienankarjalan kielikurššija.