Natalja Anhimova sai uz’ pauklahj
Natalja Anhimova om Šoutjärven muzejan ohjandai jo enamba 30 vot. Hänen radon voziš muzejan fond täutase uzil eksponatoil, oli avaitud äi melentartuižid ozutelusid da päiväspäi päivähasai jo enamba turistoid tuleskeleb Šoutjärven etntografižehe muzejaha, miše tedištada enamba vepsän rahvahas. A Natalja Anhimova surel tahtol iče vedäb tundištoituzmatkad da starinoičeb adivoile, kut vepsläžed ende eliba da mitte elo heil om nügüd’. Kaikes ičeze rados Natalja sai uden rindznaman ”Panendas Rahvahaližen ühthižkundan kehitoitusehe”.
Pauklahjoiči Natalja Anhimovad rindznamal Rahavahaližen da regionaližen politikan ministerstvan radnik Elena Migunova.
— Pauklahjoičend oli Karjalan rahvahaližen muzejan sures zalas i nece oli minei mel’he, miše minei anttihe pauklahj muzejas, miččes minä radan jo 33 vot, meiden ühtezradnikoiden keskes. Nece pauklahj om tugi da hüvä arv minun da kaiken kollektivan radon täht, sanui Natalja Anhimova.
Paiči radod muzejas Natalja Aleksandrovna pajatab Vepsän rahvahan horas, kus kaik ühtnikad ei vaiše kaičeba vepsän tradicijoid, no ozutaba-ki niid toižile ristituile pajoiden da karguiden kal’t.
Vodel 2020 Natalja Anhimova sai ”Karjalan valdkundan kul’turan arvostadud radnik”-nimen.
