Mujejärven piirin koululaiset hiihettih “Varlamovin polkuo” myöten Neuvoštoliiton šankarin Nikolai Varlamovin kuatopaikalla. Joukošša oli 45 ihmistä Mujejärven piirin Rukajärven, Mujejärven, Lietmajärven ta Lentieran šekä Segežan piirin Perttijärven eläjät: koululaiset ta heijän vanhemmat. Retken matka oli 24 kilometrie.
— Myö hiihtimä šankarin kuatopaikalla. Šielä vuotena 1943 Onda-joven itärannalla taistelušša Nikolai Varlamov heittäyty ampuma-aukkoh ta oman elämän hinnalla anto omalla joukolla mahollisuon ottua taistelupisteh. Vihollisen punkti oli tuhottu, šelitti retken järještäjä, Al’tair-klubin johtaja Viktor Puršel’ Rukajärven kulttuuritalon šivulla.
Kuatopaikalla ta šankarin muistopaččahalla oli pietty mitinki ta kukkien panomisen seremonija. Retken ošallistujie kostitettih kalakeitolla, piirakoilla, rašvalla ta čäijyllä. Rukajärven eläjät valmissettih polkuo retkie varoin lumikelkkoilla šekä lepopaikkua omin voimin. Varlamovin hiihtopolku -retki oli pietty toiseh kertah.