Marjaferma rakennetah Mujejärven piirissä
Mujejärven piirissä rakennetah šuurta fermua, missä ruvetah kašvattamah marjoja. Šuunnitelmien mukah fermalla kauširuatoloih voit tulla yli 400 ihmistä Karjalašta ta šen ulkopoleltaki.
Paikallini bisnesmieš Ivan Samohvalov luajentau omua taloutta ta tänä vuotena tahtou käyttyä 27 hehtarie muata hukanmarjapuun, mušta- ta ruškieviinimarjan, tartukin, tuomipihlajan, muštamarjapihlajan kašvattamiseh.
Viime vuotena Ivan Samohvalov allakirjutti šopimukšen Karjalan halličukšen kera, kumpasen mukah mieš šai tukie laittehiston hankkimiseh marjojen šäilyttämistä ta muokkaušta varoin. Nyt jiäškuappi- ta pakaštin -kompleksin rakentamini on lopetettu ta uuši šähköašeman ošašto on ašetettu.
Ferman rakennuštöissä ruatau 15 ihmistä, kaikki ollah Mujejärven pos’olkan eläjie. Nyt hyö rakennetah taloja kauširuatajie varoin, kumpaset ferman avuamisen jälkeh tullah keryämäh marjoja. Šuunnitelmien mukah kauširuatoloih voit tulla yli 400 ihmistä Karjalašta ta šen ulkopoleltaki.
Tämän vuuvven loppuh šuaten fermeri Ivan Samohvalov meinuau oštua uutta tekniikkua ta mineralisie lantoja, parentua muata ta issuttua monivuotisie marjapenšahie.
