Uuši näyttely on omissettu Venäjän Pohjosen ainutluatusella puuarhitektuurin muistomerkillä, kumpani tänä vuotena ois täyttyn 250 vuotta. Näyttelyššä on esillä ihmehellisešti šäilynyitä opasoja, kirikön vanhoja valokuvie, tauluja ta grafiikkakuvie.
— Tämä on vuuvven enšimmäini nättely ta še on omissettu Kirikön merkkipäivällä. Näyttelyn avulla myö tahomma kiinnittyä huomijuo kirikön elvyttämiseh. Tämä toiminta alko heti tulipalon jälkeh, šano Karjalan taitomusejon johtaja Varvara Lebedeva avajaisissa.
Näyttely on kolmešša šalissa. Niissä on kerrottu kirikön arhitektuurista, ikonostasin istorijašta ta rekonstruoinnista, kumpasešta vaštuau Ortodoksini Pyhän Tihonin humanitarini yliopisto, šäilynyistä oprasoista, kumpaset oltih restauroinnissa tulipalon aikana, kirikön istorijašta ta šen rekonstruoinnin mänöštä.
— Myö pakajamma kiriköštä kuin eläväštä. Palannun kirikkö oli nelläš ta myö toivomma, jotta kohta niämmä viijennen kirikön. Olemma ylen onnellisie, još meijän näyttelyštä tulou vielä yksi aškel šen elvyttämiseh, korošti näyttelyn kurattori L’udmila Nikiforova.
Näyttelyn avajaisissa esiinnyttih partn’orit, kumpasien luvušša on Ortodoksini Pyhän Tihonin humanitarini yliopisto. Avajaisissa oli kerrottu, kuin oprasojen rekonstruointi mänöy.
Tuiskukuun 17. päivänä kello 12.00 šiitä paissah tarkemmin. Yliopiston spesialistit pietäh musejošša luvento Uspenjan kirikön ikonostasin rekonstruoinnista.
Kontupohjan Uspenjan kirikkö. 250 vuotta -näyttely on auki šulakuun 7. päiväh šuaten.