“Kipinä” valmistautuu Uuteh vuoteh ta paistau piiraita
Uuši vuosi on jo kynnykšellä. Kipinä-lehen pimiekuun numeron šivuja šeluallen šie löyvät pruasniekalla omissettuja šivuja: luvet Veikko Pällisen ta Ol’ga Mišinan runoja talvešta šekä Uvvet kuatančat -starinan, šuat tietyä karjalaisien lapšien talvihuviloista ta Kekristä — vanhašta karjalaisešta Uuvvešta vuuvvešta.
— “Kipinän” verekšen numeron avulla lapšet voijah valmistua heti kakši uuvvenvuuvven luajošta – hyvittelykortti Uuvvekši vuuvvekši šekä kirjaiskuori mukavua Panttileikkie varoin. A uuvven kuvalehen korissukšena on vuuvven 2024 kirkaš ta kaunis kalenteri, kumpasen piirušti taiteilija Mihail Solovjov, kertou “Kipinän” toimittaja Ol’ga Smotrova.
Šamoin kuvaleheštä šie löyvät mukavan starinan Urho-hiireštä ta Reppi-kiššašta, niät mitä karjalaini emäntä Prokoin Mašoi pitäy omašša lippahašša šekä opaššut paistamah dročon-piiruata. Ol’ga Smotrovan mukavašta Parandajien vezien mua -kirjutukšešta šie tiijuššat Karjalan šoista ta muanalasista vesistä. A Irina Zaitseva artikkelissah “Heposen kuva tuou onnie” kertou šiula Kiži-musejon uuvvešta Tulini heponi -näyttelyštä lapšilla.
Kuin ainaki “Kipinäštä” löytyy kiinnoštavie tehtävie ta aivopähkinöjä purtavakši.
