2. uhokud sädas Ol’ga Žukovan mušteht. Voz’ tagaze 31. vulukud tuli vest’ — elospäi läksi vepsän kelen tedai da opendai, kirjutai da runoilii, baltianmeren suomalaižiden keliden kafedran docent Ol’ga Jur’evna Žukova. Siš päiväspäi mäni jo üks’ voz’ i uhokun augotišes tehtas Ol’ga Žukovan mušteht.
Ol’ga sündui Podporožjen rajonas, Kurba-küläs. Jäl’ghe školad hän openzihe Petroskoin Valdkundaližes universitetas baltianmeren suomalaižiden keliden kafedral.
Kaiken ičeze elon Ol’ga omišti vepsän kelele, jo laps’aigaspäi kirjuti nel’l’rivižid runoid, penid pajoid da starinoid, miččid paksus paindihe ”Kipinä” -kulehteses da ”Kodima” -lehteses. Hän tegi äi openduzkirjoid, fol’klorkogomusid, kirjoid lapsiden täht.
— Muštehtal mö keradamoiš ristituidenke, kudambad teziba Ol’gad. Mö ühtes muštištam händast, lugeškam hänen runoid da kacuškandem fil’man hänes, sanui muštehtan tegii Larisa Čirkova.
Vastusele voib tulda kaikutte, ken tahtoib muštištada čomad, lahjakast vepsläšt našt, völ kerdan lugeda hänen runoid da kundelta toižiden muštlosid hänes.
Ol’ga Žukova läksi elospäi noren, no ičeze lühüdas elos hän ehti tehta lujas äjan vepsän kelen kaičendan da kehitoitusen täht. Mušt hänes eläb hänen kirjoiš, runoiš, openduzkirjoiš da ristituiden südäimiš.
Mušteht tehtas 2. uhokud Rahvahiden sebruden kodiš (Titovan ird 3, koumanz’ žir) 17:30 časud.