“Miun pieni kotimua” on Kalevalan päiväkojin numero kakši ta Kalevalatalo-etnokulttuurikeškukšen yhtehini projekti. Šen aikana lapšet liityttih kotišeutututkimuštoimintah ta tiijuššettih, mitein karjalaini talo rakennettih ta korissettih, mimmoni istorija ta kulttuuri liitty šiih.
— Lapšet käytih etnokeškukšešša, missä šuatih tarvittavie tietoja karjalaisien taloista ta elämäštä. Šiitä hyö vanhempien tahi kašvattajien kera luajittih omin käsin talojen tahi taloušrakennukšien mallija. Talot tultih oikein mukaviksi. Ne on luajittu erilaisista materialiloista ta hyvin näytetäh perintehellisie elämäntapoja, šelitettih projektin järještäjät.
Kilpailuh ošallistu perehien ta päiväkotien ryhmät “Kapitoška”, “Tijaset” ta “Varpuset”. Arvoštelijat ihaššukšissa otettih vaštah ruatoja ta jokahini niistä oli palkittu omašša nominatijošša.
Ruavot on esillä näyttelyššä Kalevalatalo-etnokulttuurikeškukšešša kevätkuun enšimmäiseh päiväh šuaten.