Kalevala: hahmojen šelvityš

Omie tauluja näyttelyh tuotih taiteilijat Julija Rubtsova ta Galina Melehova. 0+. Kuva: Uljana Tikkanen

Kakši taiteilijua Julija Rubtsova Piiteristä ta Galina Melehova Koštamukšešta tuotih näyttelyh omie tauluja, kumpaset näytetäh Kalevala-runoelman hahmoja, tapahtumie, uškomukšie ta perintehie. Voipi kaččuo niih tauluih ta niin kuin lukie runoja.

— Tauluja, kuvie ta hahmoja taijošša autetah ymmärtyä paremmin runoja. Eri taiteilijat eri tavoin näytetäh “Kalevalua”. Mie hyvin tiijän molommat taiteilijat. Julijan taulut mie nävin vuosi takaperin Sortavalašša ta mie olin ihaššukšissa, kuin šyväšti hiän tutki yksityiskohtie ta kanšantutkimuštietoja. Galinan mie tiijän oikein ammuin ta hänen tauluissa on äijän simvolija ta metaforie, šano näyttelyn avajaisissa Kalevala: hahmojen šelvityš -projektin johtaja Irina Rinkevič.

Näyttelyššä on joka taiteilijan 12 tauluo ta niissä on erilaisie juonija. Kaččoja tunnuštau tunnettuja hahmoja ta tiijuštau hieman enemmän heistä tahi heijän elämäntavoista.

Kalevala on muailman tunnettu eeppini runoelma. Tänä vuotena runoelman täyvvellini julkaisu täyttäy 175 vuotta. Taiteilijat aina kuvattih runoja ta hahmoja, jokahini luati šitä omašša tyylissä. Nykyjähki karjalaiset runot ta eepossa on loppumatoin innoššukšen hete.

Näyttely on valmissettu Kalevala: hahmojen šelvityš -projektin rajoissa, kumpani šai Karjalan piämiehen granttifondin kannatušta.