Karjalan kanšallini teatteri, Karjalan kuvataitomusejo ta Karjalan tevollisušistorijan gallereja yhissyttih Kalevala-runoelman tietäjän, Paralleli-järješšön johtajan Irina Rinkevičin johtamašša projektissa, jotta auttua rahvašta, erityisešti nuorisuo paremmin ymmärtyä “Kalevalua” kuvataijon ta hahmojen šelvittämisen avulla.
Runoelman tutkimisella on omissettu marafoni, kumpasešša on kymmenie toimenpitoja tuiskukuun enšimmäiseštä viimeseh päiväh šuaten online ta ofline muotoloissa.
— Projektin rajoissa piettävä marafoni on loppušuoralla. Ošallistujat nähäh kuin äijän on muotoja tutuštuo “Kalevalah”: spektaklija, näyttelyja, tauluja, pelijä ta toisie. Niijen avulla myö tutkimma hahmoja ta šelitämmä, mitein ne autetah ymmärtämäh eeppistä runoelmua, šelitti projektin johtaja Irina Rinkevič.
Projektin aikana oli kekšitty eksperimentti. Karjalan kanšallisešša teatterissa piettih vaštautumini Kullervo-spektaklin ohjuajan V’ačeslav Pol’akovin ta taiteilijan Jegor Kukuškinin kera niillä, ken jo kaččo spektaklin. Pakinašša oli kerrottu, mitä luatijien joukko tahto esittyä kaččojilla. Vaštautumisen jälkeh ošallistujat kačottih spektakli uuvveštah, a mitä mieltä hyö ollah eksperimentistä hyö kirjutetah VK-verkošša. Julkaisuja voipi löytyä Kalevala open -ryhmän šivulla.
Projektin tulokšet ilmotetah kevätkuun 10. päivänä.
Kalevala: hahmojen šelvityš -projekti toteutuu Karjalan piämiehen granttifondin kannatukšella.