Ozuttelut ollah Vladimir Potaninan hyvyönluadijan fondan Muzei ilmai rajoi -programman mugan pietyn kogo Van’an kilvan tiloksennu. Täs kilvas Kanzalline muzei voitti da sai grantan. Ozutteluloin valmistamizes avvutti Ven’an dizaineroin liiton Karjalan ozasto. Hos joga ozuttelus materjualat on ezitetty omah tabah, yhtistäy niidy yksi – dizainan kehittämine Karjalas.
Dizain-sanua ruvettih käyttämäh Ven’al vaiku XX-vuozisaun toizes puoliškos, ga enzimäzet dizainuruavot roittihes ylen ammui.
Suurin ozuttelu on sijoitannuhes muzein toizeh kerrokseh. Sen nimi on “Aijan format. Ezinehien da ymbäristön dizainan histourii (XIX-XX-vuozisuat)”. Täs on pandu kačottavakse 200 ezinehty. On ezinehii, kuadamii luajittih iččeh opastunnuot kylämuasterit dai ammattidizaineroin ruaduo. Ezinehien joukos ollah puuhizet kuožalit, lippahat, tuohizet viršit da puzut, kudamii piettih vie XIX-vuozisual Anuksen, Priäžän da Petroskoin ujezdan da Oniegantagazen kylis. Mieldy kiinnitetäh samal vuosisual luajitut sukset. Täs näemmö jo nevvostoliitonaigazii ezinehii – Karjalan koivu- da Oniegantagaine kirjoindamine -arteliloin, Sordavalan meebelii- da suksifabriekan da Petroskoin ombelufabriekan tuottehii. Kaikkien nämmien ližäkse on ezitettygi XX-vuozisuan toizel puoliškol karjalazil käytös olijoi ruadobrujii, sobii, jallaččimii da lapsien bobazii.
Toine ozuttelu on sijoitettu muzein enzimäzeh kerrokseh, sen nimi on “Aijan liiniet. Karjalan grafiekkudizanan histouries (XX-vuozisada)”. Täs on ezitetty Karjalan julgavoloin ilmah piästettylöin kniigoin dizainu. Tärgevimäs kohtas on Kalevala-eepossu.
Mollembat ozuttelut ruvetah ruadamah ligakuun 25. päivässäh. Ozuttelut roitah mieleh ei vaiku dizaineroil, ga kaikil toizil – lapsil dai nuoril.