Aloittelijie bisnesmiehie autetah ohjelmien kautti
Karjalan piämieš Artur Parfenčikov kävi työmatalla Kalevalan piirissä. Hiän tarkisti mitein kannatetah aloittelijien bisnesmiehien yrityštoimintua.
Kalevalašša Karjalan piämieš kävi kahen aloittelijan bisnesmiehen luo, kumpaset šuatih raha-apuo oman yrityštoiminnan alottamiseh ta kehittämiseh. Aleksandra ta Dmitri Novos’olovit šuatih grantti muataloušministerijöltä Aloittelija fermeri -ohjelman mukah muatalouven kehittämiseh.
– Meilä aina oli kinnoššuš muatalouteh, nyt piättimä luatie oma ferma. Muatalouven ministerijön grantti autto alottua oma yrityštyö. Šuunnitelmissa on šuaha muatontti liävän rakentamiseh, rakentua liävä ta ottua ruatajie fermalla, kerrottih Novos’olovit vaštahotolla piämiehen kera.
Šamoin fermeri šai 10 vuuvvekši vuokrah mua-alan heinänniittuo varoin ta rakennukšen, missä elukkoja pietäh kuni rakennetah uutta liävyä.
– Fermerija varšinki Karjalan pohjosešša on vähän, šentäh heitä pitäy kannattua. Mie iče tarkissan kaikkija näitä fermija, lisäsi Artur Parfenčikov.
Kalevalalaini Natalja Pavlova on vielä yksi Kalevalan yrittäjä, kumpani šai tukie. Natalja on viijen lapšen muamo, kolmella heistä ei ole vielä 18 vuotta. Lapšien kašvattamisen lisäkši Natalja oikein tykkyäy omua ruatuo, hiän on parturi. Natalja kirjutti bisnesšuunnitelman ta šen toteuttamiseh šai 200 tuhatta rupl’ua Kalevalan piirin työvoimatoimistolta. Näillä rahoilla Natalja otti vuokrah tilan kampuamuo varoin. Kampuamo jo toimiu Kalevalašša, šiinä käyväh nyt vain Kalevalan eläjät, ka Nataljalla on šuunnitelmissa ottua vaštah ihmisie nuapurikylistäki.
