Muzejiden ö: Necen pätničan Šoutjärven muzei linneb avoin möhässai
Necen pätničan Šoutjärv’ varastab adivoid susedkülišpäi da Petroskoišpäi. ”Muzejiden ö”-akcii om hüvä voimuz tulda muzejaha, ku tobjimalaz necile azjale ei ole aigad, sikš ku necil päiväl se linneb avoin möhässai. Programmas om äi erazvuiččid azjtegoid eri-igäižile ristituile.
— Täl vodel päazjan azjtegod, miččed mäneba meiden muzejas, om omištadud Opendajan vodele. Toivom, miše ühtel meiden vastusilpäi vasttasoiš erazvuiččiden sugupol’viden opendajad – nored da vanhad. Mugažo necil vodel “Kodima”-lehtez praznuičeb ičeze jubilejad. Kirjišton radnikad vaumičeba lehtesen 30-voččen päiväle omištadud vastusen, sanub Šoutjärven vepsläižen etnografižen muzejan pämez’ Natalja Anhimova.
Lopiše “Muzejiden ö”-akcii surel ezituzlaval – muzejan sarajal, kuna muloi mülüi enamba sada mest. Sigä linneb avoin scen sädaimehiden täht. Kacujad voiba kacta rahvahan karguid, kundelta pajoid da paginoid muzejan istorijas da nügüdläižes elos.
Ližatedoid siš, kut mäneb ”Muzejiden ö”-akcii Šoutjärven vepsläižes etnografižes muzejas voib sada tägä.
