Eloho läksi verez “Kipinän” nomer vepsän kelel. Lugijad löudaba sigä tal’vpraznikoile omištadud materialoid da äi toižid, miččid voib lugeda tal’vpästusiden aigan.
Necen voden “Kipinän” jäl’gmäine – tal’vkun – nomer om jo lähtnu. Sigä voib löuta tal’vpraznikoile omištadud materialoid, harjoitusid, kuvid da mastar’-klassan.
— Amu jo oli taht painda meiden kulehteses Ilja Polunicinan “Villasine sarn”. Ilja Polunicinan kirjoid nügüd’ lugeb kaik Karjala. Minun-ki tütär lujas navedib hänen sarnoid da starinoid. “Villasine sarn” om mugoine čoma tal’vesine sarn. Olem ihastusiš, miše nügüd’ sidä voib lugeda vepsän-ki kelel, starinoičeb “Kipinän” vepsläižen nomeran keradai Galina Baburova.
“Kipinän” toimitajiden melen mödhe, uz’ nomer tegese hüväks lahjaks Udeks vodeks. Sigä om äi melentartuižid da tarbhaižid materialoid, miččid om čoma lugeda tal’vpästusiden aigan.