Juustuo Karjalah da Piiterih
Vuvvennu 2020 Andrei Polevšikov yhtyi Agrostartap-grantoin kilbah, puolisti oman biznes-projektan da sai den’gukannatuksen oman ferman kehittämizekse. Fermu on Lahdenpohjan piirin Miklin kyläs.
Andreih niškoi juuston keitändy enziallus oli mieliruavonnu, sih niškoi oldih omat maijot da himo opastuo uudeh neroh. Andrein akku Tatjana opastui keittämäh juustuo tundiettulois juustonkeittäjis. Enzimäzii juustoloi molodoit luajittih omah iččeh da dovariššoih niškoi suures kattilas. Sit tuli mieleh luadie ruadopaja.
— Ilmai valdivollistu kannatustu emmo ruohtis algua tädä ruaduo, sanou ammatilline juustonkeittäi Tatjana Polevšikova Mua- da kalatalovuon ministerstvale.
Grantah pereh osti muapalan, traktoran ližälaittehienke, lypsändykonehen da kai keitändäh niškoi tarvittavat laittehet omah ruadopajah.
Tänäpäi ekofermal on kymmene sarvipiädy da enämbi 20 kozua. Joga päiviä täs fermas suajah enämbi sadua litrua maiduo.
Tänäpäi Karel’skije Laga -brendu valmistau kymmenii juustolajii da maidohizii tavaroi, kudamii voibi ostua Karjalan, Piiterin da Leningruadan alovehen erähis laukois, Petroskoin da Piiterin erähis restoruanois.
Lähiaigua Agrostartap-grantu pidäy uvven kilvan. Mennyt vuon kannatuksen sai Karjalan 19 yrittäjiä sarvipiälöin, kodijänölöin da mehiläzien kazvatandah da hoidoh, kartohkan, sadumuarjoin kazvattamizeh.
