Kaskesniemes on pandu rattahile jo kolmas AYI:n projektu. Enzimäi, kolme vuottu tagaperin azuttih lapsien kižakohtu järvirannas. Mennyt sygyzyn rinnal azetettih kaheksa trenažourua. Tänävuon tahtotah luadie uuzi pirsu tulipalomašinoih niškoi. Vahnu, 1980-vuozil azuttu, on ylen pahas kunnos. Tulipalomašin ei piäze ottamah sit vetty järvespäi. Vies olijat parretgi hapattih. Lapset kezoil kävves voijah sattavuo.
– Koit ollah pikkarazet, enimät puuhizet koit ollah. Ylen äijy požuarua enne oli meile. Yksi kodi palau, toine kodi palau, ainos oli požuarua. Sithäi duumaičimmo, duumaičimmo, pidäy luadie tänävuon. Ku voinnemmo nečen pandemien kel kerätä rahvahas jengua, sanou Kaskesniemen AYI:n piälikkö Larisa Saveljeva.
Ymbäri vuvven Kaskesniemes eläy 14 hengie, ga kezäl on sada-sada kaksikymmen, tulou ylen äijy lastu da nuordu. Projektu maksau lähes 300 tuhattu rubl’ua, rahvahal pidäy kerätä 30 tuhattu.
– Jygiettävy, tänävuon on jygiettävy. Tänävuon en tiijä onnuako, kui keriän. Onnuako omat jengat panet. Libo ei rodei projektua, en tiijä, prähkäy Larisa Saveljeva.
Honganual AYI azuttih vaste mennyt vuvven lopus. Talvekse tänne jiäy puolikymmen hengie, kezäl tuaste kylä on täyzi rahvastu. Vahnembien kodiloih tullah lapset da bunukat. Honganual piätettih azuo lapsien kižakohtu da sportulagevo mägyričäl suuren kuuzen ies. Projektu maksau läs puoldu miljonua rubl’ua. Rahvahan vuitti on 50 tuhattu.
– Meijän kyläs on äijy aktiivistu rahvastu, duaččuniekkua. Kai ruavot myö ruammo yhtes. Kaksi kerdua keräimmö jengua meijän časounan obrazoin restavratsieh. Kerrymmö talgohoh, konzu pidäy. Ei ammui tiijustimmo, ku voimmo suaha valdivon abuu omih ruadoloih. Sendäh azuimmo AYI:n. Myö kyzyimmö rahvahal, midä pidäy ruadua enzikädeh. Hyö tahtottih kižakohtan lapsile da sportulagevon, sanou Honganuan AYI:h kuuluju Aleksandra Teslenko.
Keskus-Nuožarven AYI tahtou kohendua voinumustomerkin. Se nostettih vuvvennu 1987. Projektu maksau 308 tuhattu, nuožarveläzil on kerättävy 15 tuhattu.
– Kai nenet jo pakutah plitkat. Myö opimmo ičeväil tartuttua plitkat järilleh, ga eibo net pyzytä, pidäy putilline remontu. Sit myö luajimmo moizen projektan. Meidy ylen äijäl projektan kirjuttajes autoi meijän kyläkunnan haldivon piälikkö L’ubov Nikolajevna. Myö tahtoimmo luadie täl mustopäiväl, a sit koronaviirus muutti meile kai pluanat. Vaiku avatah kai hovut meile, sit rubiemmogi, sellittäy Keskus-Nuožarven AYI:n piälikkö Galina Jelisejeva.
Vahnah mustomerkih nuožarveläzet vie tahtotah ližätä uuttu nimie.
– Meile nygöi täs Nuožarves ei jiännyh ni yhty veteruanua, semmostu, kuduat oldih voinal. Sit meile on luajittu mustokirju. Konzu täydyi 70 vuottu Voitole, myö moizen mustokniigan luajimmo. Net kai sugunimet nygöi panemmo yhteh joukkoh tänne, anna ruvetah yhtes kohtasgi, sanou Galina Jelisejeva.
AYI:n projektoin kilbah Nuožarven kylähaldivo työndi kolme projektua, kai kolme voitettih. Kyläkunnan haldivon piälikön L’ubov’ Ponomar’ovan sanoin mugah, hyö ylen tarkah valmistetah kaikkii dokumentoi kilbah da joga kerdua joga projektah Nuožarven kylähaldivo vältämätä panou jengua omas kukkarospäi. Vikse sendäh kai kolme Nuožarven projektua puututtihgi voittajien joukkoh.
Parahite nygöi Nuožarven kyläkunnas kerätäh rahvahas jengua AYI:n projektoih. Net pidäs kerätä heinykuussah. Kai ruavot on piettävy vuvven loppussah.