Tervehys on kuldua kallehembi

Jo kolmattu vuottu Vera Potapova ottau vastah soittoloi Kiirehellizen mediekkuavun stansiel. Kuva on otettu Vera Potapovan arhiivaspäi

– Ruat Petroskoin kiirehellizen mediekkuavun stansiel 32 vuottu. Mindäh valličit juuri sen ruadopaikan da oligo mieles vaihtua ruadopaikku?

– Mediekkuopiston loppiettuu sain ruskien diploman, sendäh voin vallita, kunne lähtie ruadamah. Diploman harjaittelun aigua ruavoin Petroskoin kiirehellizen mediekkuavun stansiel, harjaittelu rodih mieldy myö. Sendäh valličin juuri sen ruadopaikan. Silloi ruado kiirehellizen mediekkuavun stansiel oli prestiižnoi. Piästä ruadamah “skoroih“ oli jugiettavu. Šouferiloigi vallittih ylen tarkah, šouferil pidi sen tämän vuvven ruadua taksil libo avtoubusal, ku hyvin tiediä linnan pihat. 

Kolmekymmen vuottu minä olen ruadanuh feršalinnu liiniel, palvelin kiirehellisty abuu tarvittavii ristikanzoi. Nygöi kolmattu vuottu ruan soittoloin vastahottamizen feršalinnu libo ohjailijannu.

Ruado on mieldy myö, nikonzu en tahtonuh vaihtua sidä. Meil on hyvä ruadajien joukko, enimite on naizii. Nuorinnu joga vuottu kolliegoinke Mediekkualan ruadajan pruazniekannu kävyimmö huogavumah luonnon helmah. Tänäpäigi piemmö yhtes merkipäivii da pruazniekkoi, toiči kävymmö teatrah.

Ei ammui stansiel azuttih remontu, ohjailijoin pertis rodieu enämbi tilua. Terväh Petroskoin kiirehellizen mediekkuavun stansii rubieu kuulumah Karjalan yhtehizeh enziavun keskukseh. Petroskoin ohjailijat ruvetah ottamah vastah soittoloi kogo Karjalaspäi. Sie rubieu ruadamah kaksitostu ohjailijua.

Ruadua kiirehellizen mediekkuavun stansiel oli prestiižnoi. Piästä ruadamah “skoroih“ oli jugiettavu. Šouferiloigi vallittih ylen tarkah, šouferil pidi sen tämän vuvven ruadua taksil, ku hyvin tiediä linnan pihat.

Vera Potapova, feršali

– Puaksuh rahvas sanotah, ku “skoroidu” pidäy vuottua pitkän aigua. Mis se rippuu?

– Kai soitot juatah kiirehellizeh abuh libo enziabuh. Kiirehellisty abuu tarviččijat voijah vuottua mediekkoi kahteh čuasussah. Niilöin luo, ket tarvitah enziabuu, medikoil pidäy ehtie piästä kahteskymmenes minuutas, ga se on linnan rajois. Petroskoin “skoroi“ palvelougi lähästy Onieganrannikkuo, sanommo, Šuojun, Čalnan, Besovtsan kyliä. Sie abuu vuotetah hätkembi. Pidäy ližätä, ku normien mugah jogahizeh 10 000. hengeh pidäy olla yksi mašin. Petroskois da sen lähälolijois paikois eläy läs 300 000 hengie. Äijygo mašinua pidäy? Ruadauhäi vaiku 16-17 mašinua.

Talvelgi toiči on jugei piästä voimattoman luokse, vie jugiembi erikseh seizojih personuallizih taloloih mikropiirilöis. Ku dorogat ei suomittu lumes, toiči pidäy jalloil astuo sadoi metriloi.

Ližiä lugiekkua “Oman Muan” tulies noumeras 29. heinykuudu.