Čoma lahj vepsläižiden täht
Spektaklin nimi om ”Kodi iknoil pöudolepäi”. Rahvahaline teatr om vaumičenu sen lujas lühüdas aigas. Kacmata rigoho satuz om tulnu čoma i se tuli mel’he kacujile. Spektaklin täht filologian tedodoktor Nina Zaiceva kändi vepsäks Aleksandr Vampilovan pjesan.
Aleksandr Vampilov om tetab venälaine dramaturg. Hän sündui vodel 1937 Irkutskan agjan Kutuluk-külähä. Laps’aigaspäi Aleksandr navedi lugeda, a iče kirjutada hän zavodi völ opetes školas – kirjuti runoid, toimeti seinlehtest. Siloi-žo Aleksandr zavodi väta školan teatras. Hänen pjesoiden mödhe om pandud äjad spektakl’ad, om tehtud eskai fil’mad, miččed oma tetabad äjile – ”Vanhemb vel’l’”, ”Sorzmectuz”.
”Kodi iknoil pöudolepäi” om lühüd komedii armastusen polhe. Istorii om ani üks’kerdaine. Nor’ opendai, kudamb radoi küläs koume vot, pätab lähtta elole posadaspäi lidnha. Hän tuleb prostimahas ičeze susedkannoks da jäb hänenno. Spektakliš vändab hor (sen roliš oma Vadim Malinin, Dmitrii Ivanov, Ksenia Šir’akina, Anni Kondrakova, Lada Karpova) da päroliš om kaks’ akt’orad – Aleksandra Aniskina da Andrei Gorškov. Aleksandral oma pohjoižvepsläižed jured. Hän jo amu uništi väta spektaklid vepsän kelel. Aleksandra sanub: ”Om znamasišt, miše nece om Vampilovan pjesa. Hän om Irkutskan agjaspäi, vepsläižed ende eliba sigä. Sigä eskai hänen familii sanutas toinevuiččikš – siš om paineg a-kirjaimehe , sanutas: ”VAmpilov”. Sur’ spasib Nina Zaicevale kändmižes da Vepsän kul’tursebrale tuges. Varastam kaikid teatras!”
Spektaklin ohjandai om Petroskoin tetaban teatran päohjandai Snežana Saveljeva. Kut hän iče sanub, oli taht tehta Vampilovan pjesan pohjal istorijan, mitte voinuiži olda miččes taht vepsläižes küläs. Snežana sanub: ”Spektakliš om äi pajoid, muzikad, om vepsläižid karguid-ki. Ned om vajehtadud. Nece ei ole todesine fol’klor. No minä meletan, miše mö olem tehnuded čoman radon”. Snežana sanui, miše artistad surel tahtol tartuiba neche radho. Väta vepsän kelel heile abutaba vepsän kelen kursad da ičeze kodikelen tedod. Andrei Gorškov sanui: ”Minä olen karjalaine, minun kodipagin koskub vepsän kel’he. Sikš voin sanuda, miše väta vepsän kelel ei ole jüged. Minä pidän kaik sanad päs”.
Spektakl’ vepsän kelel om tehtud Rahvahaližen politikan ministerstvan da Vepsän kul’tursebran tugele, federaližen subsidijan mödhe, mitte tugedab Venäman Pohjoižen, Sibirin da Edahaižen Päivnouzman igähižid da vähäluguižid rahvahid.
