F’odor Karhu on šyntyn Vanhan Lietmajärven kyläššä 26. oraškuuta 1959. Hiän lopetti Tiikšin peruškoulun ta armeijan jälkeh myöšty omah kyläh. Šielä mieš eläy nytki.
Melkein koko ijän F’odor Aleksandrovič ruato Lietmajärven lespromhosissa. Hänen pojat helläšti šanottih tuaton traktorie “tir-tir-Mit’akši”. Nyt karjalaini mieš on eläkkehellä. Hiän hoitau šikoja, kanoja, käypi mečäššä, niityllä, kešällä lat’t’ual’ou vaštoja, varuštau halkoja, talvella taistelou lumen kera – hommie kyläläisillä riittäy.
F’odorilla ta hänen Jelena-naisella on kolme lašta: vanhin tytär ta kakši poikua. A šuurimpana ilona on perehen lemmikki – ainut punukka Iivana.
F’odorin vanhemmat Agrippina Mitrofanovna (pereheššä häntä kučuttih Apiksi) ta Aleksandr Vasiljevič Karhu kašvatettih kahekšan lašta. F’odor oli šeiččementenä. Vanhimmat lapšet L’uba ta Sem’on ollah šovan lapšija.
F’odor naiseh kera eletäh vanhempien talošša, šen ovet aina on auki vierahilla.
– Mie oikein tykkyän jalkapalluo, še on miun mielehini urheilulaji, koroštau F’odor Karhu. – Tiikšin eri-ikäsien jalkapallonpeluajien nimet aina oltih kuulusat koko piirillä, ta tietyšti mie niise lapšuošta alkuan kiinnoššuin pelih. Mie pelasin jalkapalloh 56 vuoteh šuaten, kuni riitti tervehyttä. Viime vuosina pelasima veteranien joukošša “50+”.
Tiikšiläiset otettih ošua melkein kaikkih pelilöih omašša piirissä, oltih ni tašavallan kilpailuissa Karhumäješšä, Petroskoissa. Nyt F’odor Aleksandrovič on aktiivini penkkipeluaja.
Karhun koko pereh laulau. Naini Jelena ruatau lapšien taitokoulušša. Hiän on Tiikšin aktivisti ta eri šuunnitelmien innoštaja, Lietmajärven kyläkunnan etuštaja. Naisen luona aina on F’odor, tovellini karjalaini mieš.