Nygyaigazet lapset kazvetah elävii kodižiivattoi nägemättäh, nähtäh niidy vaiku televiizoras libo kniigukuvis. Hyvä vie on moizii kohtii, kus pietäh kuda-midä žiivattua da kučutah toiziigi omal silmäl kaččomah. Petroskoin lähäl, Zaozerje-kyläs, täl keviäl rubei ruadamah kontaktuzooparku.
Vuozi tagaperin eräs pereh sai omah käyttöh vuitin sovhouzan endizii peldoloi da rubei ostamah erilazii kodižiivattoi. Erähät žiivatat tuodih linnan da lähikylän eläjät. Nygöi fermas on lehmii dai vazoi, heboloi da varzoi, kozii dai kozanpogii, lambahii dai vuonii, kodijänölöi omien poigienke. Löydyy tiä eri linduloi: erivärizii kukkiloi, kanoi dai kananpoigii, mustii dai valgieloi sorzii, pitkykagluhanhiloi, kaunehii tsesarkoi da hyvöindelijöi ind’ukkoi. Valläl heiniä syömäs kävelläh hevot da heijän ymbäri juoksendelou ei ammui rodivunnuh varzu.
Omas aijas seizotah počit, moizet suuret, čomat da puhtahat. Tiä voibi nähtä osluagi, ižändöin mieles, se on ylen vastukavaine. Eriže omas suures aijas juoksendellah pedrat, kezän aigua niilöin selläs lähtietäh karvat, a sarvet ollah moizet kaunehet da pehmiet, ku pl’uuššu rouno. Tämän zooparkan žiivatat ei varata rahvastu, mielihyväl juostah edeh da otetah syömisty käzis. Gu tullet aidah, net ei hypätä piäl, vaiku ymbäri sinus ruvetah punomahes. Zooparkah tulluot kävelläh žiivattoi kaččomas ižändöinke, kuduat vie saneltah midätahto joga elätis. Pienen ekskursien lopus jogahine suau nosta hevol selgäh, pienembät lapset voijah ajella poonil. Joga kohtas voibi fotografiiruija. Tiä taritah juodavakse kozanmaiduo da kodijäiččiä, nengomat syömizet pyzytäh hinnois linnan laukois. Fermas lapset dai vahnembat suajah hyväi mieldy da tiijustetah, miittumiia žiivattoi voibi kazvattua meijan puolel.